Riwwelmaddhes: An-de Kerz die Finger verbrennd – ess iss Advent!
Die Skulptur wurde 1852 als Denkmal des „Prinz-Emil-Veteranen-Vereins“ auf dem früheren Marienplatz errichtet und 1902 in den Herrngarten umgesetzt. Das Denkmal erinnert an die Hessen-Darmstädter Soldaten der napoleonischen Kriege. Foto: Torsten Boor
Aach wenn ess Wädder net mitspielt unn uns mehr-e Friehlingslifdsche umweehd unn-de Frost uns noch lang net schuggern läßd, so duuhn-mer uns jeddsd doch uff-de Advent eistimme. Wäje-de Kält brauche-mer jo net uuhbedingd-de Gliiehwoi uff-em Weihnachdsmaggd zu schlirfe, doch die woarm Briieh, die hilfd aach gäje Erkäldung unn duuht so die Gripp abweehrn. Deshalb iss mei Dewiiese: Liewer-enn Gliiehwoi uff-em Weinachdsmaggd bei milde Temberaduurn, wie-enn Gang zum Doggder.
Bei uns dehaam iss-e uuhgeschriwwe Gesetz: Ess gibd kaan Adventskranz aus Plasdigg, der muß aus nadierlische Dannezweische vom Baum sei. Unn weil-mir enn riesische Dannebaum in unserm Gadde steehn hawwe, do hodd mir-mei Bloos als Familijeowwerhaupt-de Uffdrooch gäwwe, von dem Baum Zweische fer unsern Adventskranz abzuschneide. Mid Sääg unn Laader.
Iwwerischends, Familijeowwerhaupt bin isch fer-mer Bagaasch immer nur dann, wenn sehr schwierische unn vor allem uuhangeneehme Uffgaawe zu erleedische sinn, dann haaßds: Babba vor! Ansonsde hab isch misch in die Familije eizugliedern unn rangschier viel weider hinne in-de Hieraschiie. Isch bin hald-de Hannjer bei uns dehaam.
Wäjem Adventskranz bin isch also mid Sääg unn Laader dem Dannebaum zu Leiwe geriggt. Uff der Laader mußd isch ziemlisch weid nuff krawwele, damid isch an die frische bieschsame Zweische drookumme bin. Unne erum am Baum woarn nur därre braune Äst, die schon beim Nuffsteische uff-de Laader an meim Bagge vorbeigestreifd sinn. Dodorsch hadd isch schon emol Kratzspuurn im Gesischd. Doch dess woar noch net genuch. Weider owwe im Dannebaum, do hawwe die junge Zweische meim Gewischd net mehr Stand gehalde unn die Äst sinn gekrachd unn gesplidderd unn isch stärdds samt Laader in den Baum. Mein Annorack reißd bei dem Fall uff unn domid bleib isch, Gott sei Dank, an-em diggere Ast hänge, wos mein Fall nach unne abgefädderd hodd.
Doch selbsd nach all dem Uuhbill, isch frei misch uff so-enn besinnlische Advent. Wenn des ärsde Kerzje uff-em Adventskranz flackert unn-mer kann dodebei schon frische Weihnachdspläddsjer knabbern, heehr, dann kumm isch so rischdisch in-e festlisch Stimmung. Doch aach die festlisch Stimmung hadd fer misch noch-e schmerzhafd End genumme. Mit Zeischefinger unn Daume wolld isch die Flamm von-de Adventskerz ausmache, awwer isch hadd mei Finger net rischdisch vollgespuggd. Wenn isch mid Brandbloose, uff Zeischefinger unn Daume, isch mir hab zwaa Finger verbrennt, ärsd dann iss Advent. Guude.