Breeweldibbe: Mool die Ambele annersd schalde, krieje se net hie!

Iwwerall, awwer aach grad iwwerall wo de hieguggsd, gibt’s Stroße, die wo mer Umgejungsstroße nennt: Im vordere Kracher, im hinnere Kracher, bei de Riedknibbel, bei de Bergstroße-Eugeborne oder bei de Rodgau-Aboritschinies, ja sogor die Pungschder baue sowas um sisch un ihr iwwerragend goldisch Malzfabrigg un ganz Eschellbrigge drumrum. „Eine Umgehungsstraße!“ (extra in Hochdeitsch, dasses unsern Owwermaschores aach versteed).

Nur mir Dammstädder, mir wissenschaftsstäddische Digidal-Heiner, mir abgehoowene Galaxis-Träumer un Weldkuldurerwe-Bereicherer schaffe des ned, mir liewe den Duft der Audohersteller, die immer greeßere Spriddfresser (mansche saache aach Fallussimbole) baue un nadierlisch aach an de Mann bringe – un immer mehr dann dodefoo dorsch Dammstadd breddern (beziejungsweise im Stau vor sisch hiestingge).

Un weil in de Stadd ersd die roode Sogge un dann die Schwazz-Griene alles hawwe verwaalose losse – un jedzd des ganze Kabuddene uff aan Schlaach rebarrierd wer’n soll, weil zufällisch emool Pulwer im Ondree seune Kass klimberd, hammer iwwerall Baustelle un es stehn meer Audos rum wie in Dammstadd noibasse. Momendan – un aach waascheinlisch noch wochelang – in de Heinrichstroß – do wo mer sowieso schun johrelang net mehr unfallfrei iwwer die Gass kimmd – in de Heidelberjer (schun es dridde Mool hinnernanner), am Friedensplatz, im Haadring, in de Klabbacher- un de Landgraf-Schorsch-Stroß un noch e poor meer.

Mool die Ambele annersd schalde, krieje die deire Spezjalisde digidal noch net so hie, so weid sin se hald noch ned, awwer de OB traamd schun devoo.

Un de Bürcher traamd aach – vun bessere Zeide.

Er kann sisch awwer aach wäje dem ganze Elend die städdisch Webseid (also den moderne Indernedd-Grom) oogugge un sisch treesde losse.

Do steed neemlisch: „Verkehrs-Chaos?? – muss nicht sein…denn wir informieren Sie über aktuelle Baustellen im Stadtgebiet, damit Sie Staus rechtzeitig umfahren oder vermeiden können.“

Dann isser zufridde, der gemeine Bürcher – oder er fiehld sisch verkaggeijerd un kennd vor Zorn kerzegrad in die Luft scheiße (un dess is noch vornehm ausgedriggd).