Heehr, ääwe rischde sisch jo alle Bligge von de Welt nach England. Jeder will neemlisch miterlääwe, wie dord de Prinz Wilhelm sei herzgebobbeldes Schätzje, sei Prinzessje Kathariensche, heiraade duuth. Vor allem viele Weibsbilder duuhn do vor de Flimmerkist hogge unn midde Aache voller Drääne unn vor Riehrung im Fernseehsässel dohie schmelze.

	Dateiname  :  Der Riwwelmaddhes zur königlichen Hochzeit Dateigröße  :  3,50 MBytes. Datum  :  03.05.2011 20:06

Ihr kennt mers ruuhisch glaawe, aach so e keenischlisch-firsdlische Traumhochzeit, die wärd poar Joahr spääder im Alldoochslääwe zu rer Ernischderung fiehrn. Bestimmd muß dess Prinzeßje Kathariensche – bei uns in Dammstadt haaßd die Kätt – net midde Kischeschärtz vorm Herd mid em Kochleffel um die Dibbe rum hibbe, um dess Ässe fer ihrn Herzensprinz zu koche.

Aach mid em Butzaamer samt Butzlumbe unn Schrubber wärd die aadlisch Kätt nie die Kisch buddse. Dodefier hawwe so hochwohlgeborene Mensche ihr Leid. Beispielsweis steehd do enn Buddler ständisch paraad unn liesd deene Hoheide jeden Wunsch von-de Aache ab. Awwer wenn des junge keenischlische Paar sisch oowends in ihr Brautgemach – in ihrn Kaahn – mache, do muß selbsd so-enn perseenlische Buddler die Dier von auße zumache.

Dess Schlisseloch von der Dier zum Brautgemach dess hodd nadierlisch de Prinz Willi von Inne mid em Schnibbel von seiner Zeidung – von-de London-Taims – zugestobbd. Den Zeidungsschnibbel, den hodd er vorher mid Spugge naß gemachd unn dennaach zu em Kieschelsche geformd unn dann inn-dess Schlisselloch gedriggd. Dorsch ess Schlisselloch kann so kaa Menscheseel spiggle unn zugugge, wie des Hochzeidspaar mid odder ohne Nachdhemd in de Hochzeidsnachd ihr heiße Liebe sisch beweise.

Misch deeht jo brennend indrässiern wos die Herrschafde fer Kloobabier benuddse: die Roll mid Goldborde eigefaßd, dreilaachisch odder vierlaachisch, finfhunnerd odder dausend Blatt? Na ja, de Buddler wärd dess schon wisse. Doch aach wenn e unser Heiner-Brautpaare sisch net in so em grooße Dom, wie in de Westminster Abtei, draue losse kenne, so brauche die bestimmd net abseids zu steehn.

Mid unserm Dammstadt kann in unsre ganze Rebubligg in Sache Drauung kaan aanzische Ort mithalde. Ja, als Braut unn Bräudigam wärd mer in unsre Heinerstadt fasd geaadelt, wenn mer sisch im Firsdezimmer im Hochzeidstorm, in unserm Finffingertorm, draue läßd. Bevor de Heinerborsch awwer seim Schnuggelbäärsche im Hochzeidstorm die eewische Treuje versprischd, dann hodd er se schon einische Zeid pussierd. Friehje mußd sisch e Päärsche vor de Hochzeid ärsd emol fer e Joahr odder aach zwaa verloowe.

Wie sein äldere Bruuder sisch sellemols verloobd hodd, do hodd sein klaane Bruuder de Oba gefroochd, wos die Verloowung bedaide deeht. Dodruff de Oba: Waaßdde Biebsche, die Verloowung mid seiner scheene Braut iss fer dein äldere Bruuder so, als deeht er e neij Foahrraad krieje, doch vor-de Hochzeid do därf er noch net demid foahrn; nur klingele, dess därf er ab unn zu schon.

So, unn jeddsd winsche aach mir Dammstäder Heiner deene zwaa Aadlische, em Willi unn seiner Kätt, alles Guude zur Vermäählung. Guude!