| | Echo-Online-Grafik: Gerhard Berger

Wärrglisch, manschmol machd aach-ess Chrisskindsche enn Fehler, unn duuht sisch beim Geschenkeverdaale in-de Hausdier ärrn. Unn so kimmd-ess, dass so manscher Zeitgenosse unnerm Chrissbaum-e Geschenk finne duuht, dess iwwerhaupt net uff seim Wunschzeddel gestanne hodd. Unn deshalb sinn die Dooche jeddsd kordds nach Weihnachde die Umdausch-Dooche fer die uuhgewollde Präsende.
Mid meine Geschenke woar isch eischendlisch räschd zufriede. Wie immer hodds fer misch als Mannsbild SOS – Sogge, Owwerhemd unn Schlipps – gäwwe. Aach die gefidderde Schlabbe fer misch unnerm Chrissbaum, die hadd isch-mer gewinschd. Zu uuhgemiedlisch iss ess doch, wenn-mer vor-de Flimmerkist mid kalde Fiieß siddse muß. Hoffendlisch iss dess jeddsd vorbei.
Doch mid aam grooße Geschenk hodd misch mei Baggaasch am Heilische Oowend schon glei asch ins Schwiddse gebrachd. Wie von mir gewinschd, hawwe-mei Kinner mir-enn Serwierwooche zu Weihnachde geschenkt. Doch der woar noch als Orschinal direggd vom Meewl-Abhoolmaggd verpaggd. So hodd-der mid Weihnachdsbabier unn mid-em Schleifsche drumrum noch in-em ganz flache Babbdeggelkardong unnerm Chrissbaum geläje.
Unn wie isch am Geschenkeauspagge droo woar, dess woar am Schluss von unsere Bescheerung, do hodd mei besser Stigg verlangt, den Serwierwaache auszupagge unn deen aach noch uffzubaue. Heehr, dodraus iss-e Tortuur worrn.
Schon alloo, um den flache Kardong uffzureiße, do mußd isch mid schaffe Messer awweide. Isch hab heid noch des Plasder am Middelfinger, weil isch vor lauder Krafdoohstrengung



beim Uffschneide von der Verpaggung misch mid dem schaffe Messer in-de Finger geschnidde hab. Isch hab gebluudd wie-e Sau.
Isch wäär eischendlisch-enn Fall fer-de Notarzt gewääse. Doch als Haddriejel hab isch die bluudisch Wund ignorierd unn hab misch mid dem Uffbau von dem Serwierwaache beschäfdischd. Zwaa Glaasbladde mußde in vier Messingstange eigepaßd unn verschraubt wärrn. Weider mußd-enn Griff zum Schiewe unn vier Rellscher zum Foahrn mondierd wärrn.
Wie isch endlisch die Verpaggung uffgeschnidde hadd, do hodds gerabbeld unn die Glaasbladde samd Messingstange sinn dorschennanner gefalle. An-de aane Meessingstang, do hod so-e Blassdigg-Baidelsche mid Werkzaig unn Schrauwe gebabbd. Heehr, schon aaloo um die Mondaascheoohleidung zu kabbiern, do muß-mer-e Inschenjeerausbildung hinner sisch hawwe. Mid Halbrundkoppschrauwe, Muddern, Unnerlaachscheiwe, Medallbeschlääsch, Nibbel, Kunststoffdiwwel, Kranzverbinder unn Maulschlissel hab isch mid-em bätsch-näss Hemd nach fasd zwaa Stund des Wunner vollbrachd, unn hadd den Serwierwaache endlisch uffgebaut.
Fer misch woar dess-e Erfolscherlääbnis unn somid dess eischendlische Wunner von-de Heilische Nachd. Doch nach der Mondaasch sinn noch zwaa Medallbeschlääsch iwwerisch gebliwwe unn isch wußd badduu net, wo die zwaa Stiggscher feehle sollde. Jeddsd hoff isch uff-e Wunner, dass mir mei best Stigg den Sekt mid meim Waache sischer zum Silwesder serwiern kann.
Enn Guude Rutsch, dess winschd Eisch Eiern Riwwelmaddhes.