Es iss die Zeid, wo die Naduur erwachd, ess widder griend unn bliehd unn die Veejelscher fange Friehmoijends schon ooh zu zwitschern unn zu peife. Heehr, Beem kennd isch ausreiße. Gefährlisch iss de Lenz fer einische Zeitgenosse, wenn die jeddsd in de zweide Friehling komme. Bei so mansch ooldem Bogg wärd dorsch de zweide Friehling die Friehjoahrsmiedischkeid ruckzuck verscheischd.

	Dateiname  :  Der Riwwelmaddhes zur Wahl Dateigröße  :  2,84 MBytes. Datum  :  25.03.2011 19:24

So manscher Grauhoarischer hibbd dann widder wie en junge Hersch, wenn-er nur in die Nääh von so poar junge knaggische Bebbscher kimmt. Der duuht dann balze wie enn Auerhahn, nur net so schee. Gern deeht so Manschaaner sisch aach noch im reifere Oolder in e Liewesabendeuer stärddse. Doch die Naduur erlaubds meisdens net, mid äldere Knoche noch greeßere Spring zu mache.

Doch in meim Fall duuhd mir ääwe mei Fraasche glei die Freihlingsgefiehle verdreiwe. Wenn die neemlisch mid Buddsaamer unn mid Schrubber misch von aaner Eck in die anner Eck von unsre Wohnung dreibd unn so ihrn Friehjoahrsbudds auslääbd, dann verschaischd dess bei mir alle Liieweslust. Mei Fraa hodd hald den Grundsadds: Wenn´s im Märze lenzt, aach unser Wohnung glänzt. Wenn ihr jeddsd am Sunndooch enn Friehjoahrsspaziergang plant, dann vergäßt bidde net, vorher zu wähle.

Wie haaßds doch so schee: Wer die Wahl hat hat die Qual. Doch mid deene drei verschiedene Wahlzeddel, die dess Wahlvolk am Sunndooch oohkraize muß, domid kann so mansch aaner sei Probleemsche hawwe. Hoffendlisch verkimmd die Wahl net zu so rer uuhniwwersischdlische Zeddelwärdschafd. Wer faarweblind iss, der siehd zum Beispiel net, dass de Stimmzeddel fer die Volksabstimmung griie iss, dass mer fer die OB-Wahl sei Kraizje uff em gälwe Zeddel machd unn dass die Dabbeed fer die Kommunalwahl weiß iss.

Noch dezu sinn die Zeddel dann in unnerschiedlisch farbische Umschlääsch zu stegge. Vielleischd wär ess hilfreisch gewääse, wenn ess Wahlamt enn Kurs in Babierfalde oohgeboode hädd, damid mer den riesische Wahlzeddel fer die Kommunalwahl leischder in sein Umschlooch schaffd. Alle OB-Kandidaade und aach die annern bolliddisch Beteilischde an de Wahl, wärrn "drei Kraizjer" mache, wenn die Schlacht geschlooche iss.

Uff jeden Fall mache mir Dammstädter Heiner wähle! Unn jeder Heiner machd in de Wahlkabine hinner deene Kandidaade unn deene Baddeije sei Kraizjer, die ess Besde fer die Bürscher von unsre Heinerstadt duuhn wolle unn aach kenne. Also dann: Machds guud!