Am Fassnachdssunndooch hodd Oohrhellje Kopp gastanne, als sisch der närrische Umzuuch wie-en Lindworm dorsch die Gasse geschlängeld hodd. Ja, die Oohrhelljer Mugger hawwe zesamme mid-de Wixhaiser, mid-de Erzhaiser unn mid-de Gräwwehaiser ess jeddsd schun seid Joahrn ferdisch gebrachd, dass wenigsdens die nördlische Reschjoone vun unsrer Heinerstadt fassnachdlisch belääbd sinn.

	Dateiname  :  Der Riwwelmaddhes zur Fassenacht Dateigröße  :  3,25 MBytes. Datum  :  08.03.2011 18:36

Derweil ess Zendrum iwwer Fassnachd fasd in-enn Dornreesjeschloof fällt. Weil mir hald midde-drin im Spannungsgebied vun-de daidsche Fassnachd lieje, neemlisch zwische-de alemannisch-fränkische Fassenachdsgebiede unn-de rheinische Kannewallshochbursche, deshalb wärrn-mer hiie unn her gerisse unn duuhn uns sehr schweer, unser Fassnachds-Idendidääd ze finne.Doch eischendlisch brauche mir Heiner uns ned unner-de Narrnkapp verschäämd ze vasteggele. Schun 1885 hodd sisch-de ärsde Fassnachdsumzuuch dorsch die domoolisch Residenz beweeschd. Dess woar nur meeschlisch, weil-e poar Mitglieder vun-de Torngemeinde 1846 im Saalbau, der woar Egge Riedesel- unn heidischer Staufenbärschstrooß, e Fassnachdskneip obgehalde hawwe. Dodebei hawwe die 300 Magg Iwwerschuß erzield. Unn fer des Geld hodd die Freiwillisch Feijerweehr närrische Gaddeuniforme gekriggd. Unn domid sinn die stolz wie die Spanjer zum Ludwischsbaahnhof – den’s heid ned mehr gibd – gestiwwelt unn hawwe dord ihrn närrische Generalfeldmarschall abgehoold.
Dess woar 1885, unn do hawwe nur-e poar Leidscher zugeguggd. Im folschende Joahr hodd-mer schunn-enn scheene grooße Zuuch unn ned nur enn klaane Umzuuch uff die Baa gestelld. Dess woar so-enn grooße Erfolsch, dass-mer dodruff enn eischene Zuuchverein ins Lääwe geruufe hodd.
1887 hodd sogoar-de Boijemaasder Ohly an-rer Kommidee-Siddsung vun dem Zuuchverein teilgenomme, wos dem Verein-e mordds Rennomee eugebrachd hodd. Nääwer dem Zuuch woar domals die Hauptaddragzijoon vun-de Heiner-Fassnachd-e Lokalposse. Die „Verhängnisvolle Laggstiwwel“ hodd dess Stigg gehaaße, dess-mer dorsch-e Preisausschreiwwe entdeggd unn im Saalbau gespield hodd; iwwerischends mid-eme Bombeerfolsch.
Bis zum ärsde Weltkriesch hodd-mer jedes Joahr in unsre Heinerstadt-e grooß Fassnachd gefeijerd. Doch dadenach woar-emol Ruuh mid-de Fassnachd unn dess eischendlisch bis heid. Guud, mer muß geräschd seu, mir hadde aach nach-em zweide Kriesch 1950 bis 1965 e poar Fassnachdsziesch. Awwer vun do bis heid niggs.
Doch aach ohne Fassnachdsumziiesch kann-mer in unsre Heinerstadt Fassnachd feijern. Die Karnewallsvereine mache bei uns Siddsung unn Kostiemfesdscher. Do kann-mer schun emol so-e rischdisch Schmuusedänsje mid-rer Fraa, wenns uuhbedingd seu muss, aach mid-de eischene, mache. So, unn nach dem Moddo „Seid äschde Narrn unn machd emol Kees!“ stärddse-mer uns noch am leddsde Dooch in den Fassnachdsdruuwel. Mid „Hääh hopp!“ grießd-de Riwwelmaddhes.

Dieses Thema kann nicht kommentiert werden.