| | Echo-Online-Grafik: Gerhard Berger

Heehr, isch schreib jeddsd enn Wunschzettel fer uns Heiner ans Chrisskinnsche. Vielleischd hilfd des wos unn ess Chrisskinnsche schaffd-ess, die viele Widrischkeide, die uns Heiner dooch-dääschlisch in unsrer Stadt belasde, ze beseidische. Unn mid Dinde, schwazz uff weiß, duuh isch den Brief an-de Himmel wie folschd jeddsd schreiwe:
„Lieb Chrisskinnsche,wann isch-der aach uff-de Wecker geehn solld, weil du jo in deene Dooche noch unn nöscher Iwwerstunne mache mussd, es muss jeddsd seu, denn du alloo bisd die aanzisch Hoffnung fer uns Heiner. Vielleischd kannsd-de mid-eme Nirnbärscher Drischder noch mehr Weisheid in die Kepp vun unsere Stadtregierung bringe, damid die sisch dezu dorschringe kennde, endlisch die Darmbach-Piss- unn Abfallrinn vor-de Schepp Schachdel zuzeschidde.
Oh, du lieb Chrisskinnsche, erweck die Mackdhall im Karreeh zu neijem Lääwe. Mach doch, dass sisch do drinn schnuggelische Geschäfdscher oohsiedle kenne. Aach-e schee Woistibbsche wäär dord ned feehl am Pladds. Nach so-rer strabazzjööse Eukaafstuur kennd-mer dann in gemiedlischer Runde sei Scheppsche drinke.



Unn beim Woischlirfe käme-mer dann so rischdisch in Weihnachdsstimmung, weil-de bei-em eedle Dreppsche graad maansd, e Engelsche hädd-der uff die Zung gebrunselt. Glei hädde-mer dann dord aach-en Treffpunkd fer Heiner mid Heiner unn fer Jung unn Oold.Lieb Chrisskinnsche, duuh vor allem aach die viele Lasdwäje aus unsrer Stadt verbanne.
Die Lasder solle sisch aus-em Staab mache, damid die mit ihrm Staab unser Stadt ned mehr verpesde kenne. Unn lieb Christkindsche, du engelsgleisches Weese, seu so guud unn beschwischdisch die Gemieder in unserm Staatstheaader, damit des beese Geworschdel in unserm Große Haus endlisch uffheerd. Uff-deene Brädder, die die Welt bedaide, sääh isch jo zu gern-e Drama. Doch desdewäje brauch-mer sisch doch ned glei die Kepp bluudisch ze haache.
Begrieße deehd-de dess bestimmd aach viele Heiner, wann du als , mid-eme kräfdische Flieschelschlooch iwwer-de Luisepladds fääje deehsd unn die, die uff-de Dräbbe vum Lange Lui rumlungern, e besser Lääwwe verschaffe kennsd. Aach kennd vum Himmel aus emol mehr Drugg gemachd wärrn, dass die Pagg-Gebiehrn in Dammstadt bezaahlbar wärrn.
Wie haaßds doch so schee: Dammstadt, die Stadt der Kinnsde. Unn dess kuldurelle Weihnachdsgeschenk fer uns Heiner missd doch endlisch die Wiederereffnung vun unserm neij renowierde Museejum seu. Doch bis des soweid iss, do misse-mer bestimmd noch de näggsde un de iwwernäggsde Niggeloos-Dooch abwadde. Hoffendlisch dauerd des awwer ned bis zum Sankt Nimmerleinsdooch.
So, lieb Chrisskinnsche, wann-de jeddsd noch die kapudde Strooße in unsrer Heinerstadt so heerrischde kannst, dass mir Heiner mid unser Audoos ohne Aggsebruch zum Eukaafe foahrn kenne, dann jubiliern-mir. Guude!