Noch sinn die Schuulferieje ned rum! Awwer so nach unn nach druudele die Heiner widder eu unn die Stadt belääbd sich. Die Heiner, die ihrn Urlaub in de haaße siedlische Gefilde vun de Welt verbrachd hawwe, die hawwe enn Schogg kried, wie die ääwe aus em Fliescher gestieje sinn. Ess Thermomeeder hodd neemlisch in de leddsde Dooch kaum die zwanzisch Graad geschaffd. Ohne e woarm Jäcksche geehd mer ääwe ned aus em Haus. Unn in unserm Lago Madschjoore, in unserm Grooße Wooche, do puddeld außer so e poar abgehärddede Hardgesoddene kaum enn Mensch in de Briieh.

	Dateiname  :  Der Riwwelmaddhes zum verregneten Sommer Dateigröße  :  3,20 MBytes. Datum  :  26.07.2011 17:09 Download  :  Hier herunterladen

De Siwweschläfer, der am 27. Juni uns fer siwwe Woche e woarm unn drogge Wädder profezeid hodd, dem sinn mer dies Joahr ganz schee uff de Leim gange. Dess Tief Oddo hodd em Siwweschläfer neemlisch enn gewaldische Strisch dorsch die Räschnung gemachd.
Aa vun meine Freindinne, die geraad so e Abspäggkur in Bayern machd, die hodd-mer e Oohsischdskadd geschiggd, uff der ze lääse woar: „Viele Grieß aus-em wolgeverhangene Owwerstaufe! Iss-ess bei eisch in Dammstadt aach so grau unn kiehl?“ Rischdisch, in-de vergange Dooche, do woar ess jo mehr wie Maikiehl. Unn dess während de Hundsdooche, wo mer normalerweis die Hitz kaum aushalde kann unn uns die Briieh dann in Streeme aus-de Poorn iwwer de Rigge bis zum Hinnern nunner fließd.
Mei Kolleeschin Christa, die hodd’s bei deene naßkalde Temberaduurn bese geschuggert. Deshalb hodd se sisch ihr Wollstrumphoos aus em Schrank gehold, die- e jeddsd nadierlisch bassend zu ihrm Rock dräggt. Aach ihr Freindin Marijanne, die hodd gesdern ihr Herbsdschuuh widder aus em Keller rausgekraamd.
Unn die Grilsaisong iss im wahrsde Sinn des Worddes im Juli ins Wasser gefalle. Die Metzjer unn die Flaaschabdeilunge in de Subbermärkde, die bleiwwe uff ihrm Grillguud hogge. Die Steeks in so bundische Ferdischmarinaade, die zu Zepp geflochdene Bauchspäggsträng unn die ofd viel zu salzische Wärschdscher, die geehn ääwe wäjem Wädder einfach ned iwwer die Fleischtheek.
Ess soll Zeitgenosse gäwwe, die sogoar dankbar sinn, wann die Grillsaisong ausfälld. Dann miss se neemlisch net des verkoohlde unn des zäähje Fleisch beim jäährlische Grillfesd vom Gaddenachbar runnerwääjele unn verdrigge. Unn aach von dem seu droggene Fisch unn von dem noch fasd roohe Gemies – alles vum Grill – devoo bleibd so mansch aaner bei dem Wädder verschoont.
Schlimme Folsche kann die Urlaubszeid jo ofd aach fer die Dehaamgebliwwene hawwe. Weil die fernreisende Nachbern ned logger losse, um uns ihr in Film unn Bild festgehaldene Urlaubserlääbnisse flimmernd iwwer die Leinwand stunnelang vorzufiehrn. Dodebei muss isch mer dann den Bauchspägg, der meiner Nachbarin iwwer ihrm viel zu knabbe Bikini-Heesje rausquilld, aach noch oohgugge. Unn Bauchspägg gegrilld, den will isch-fer mei Lääwe ned. Als dann, hoffe mer, dass uns de August noch enn scheene Summer bescheerd. Guude!

Dieses Thema kann nicht kommentiert werden.