Graad in so em verräjende Summer, do winscht mer sisch so herrlische Dooche zurigg, wo mer als klaane Dobbscher im Wooch in de Briieh gepuddelt hodd. Aach wenn die Sunn sisch so selden bligge läßd, so geheerd Eis am Stiel zum Summer graad so dezu, wie in-de Supp die Brogge zu-de Briieh. Eis am Stiel kriggt-mer jo iwwerall; an-de Tankstell, im Subbermaggd, im Kino odder am Ständsche im Wooch.

	Dateiname  :  Der Riwwelmaddhes zum Schulstart Dateigröße  :  3,44 MBytes. Datum  :  12.08.2011 17:27 Download  :  Hier herunterladen

Ja, sellemols hodd-mer mid Eis am Stiel uff-de Kolder uff-de Insel im Wooch geläje und hodd des Gefrorene genisslisch schmatzend abgelutscht. Meisdens hab isch die Eissordde so gierisch abgeschleggd, dass isch misch immer verspritzt unn versaut hab. Unn vor lauder Gier hab isch von dem Eis am Stiel aach ganze Brogge abgebisse. Dess eiskalde Eis, dess woar dann dorsch mein Zaahnschmelz bis nuff an-de Zahnerv unn weider bis hiie in mei Herrn sehr schmerzhafd spierbar.

Unn viel besser wie Eis am Stiel, so hodd meim Enkelsche die Woch die grooß Porzjoon Eis geschmäggd. Finf Sordde Eis mid Saahne owwedruff, die hab isch meim klaane Stoppser spendierd, weil-er-de Beginn vom Ernst des Lääwens so guud iwwerstanne hodd.
Unser Karlsche iss neemlisch eigeschuuld worrn. Stolz wie-enn Pfau hodd-er sisch zuvor moijends an-de Hand von seine Mamma uff-de neije Schuulwääg gemachd, deen-er jeddsd Dooch fer Dooch iwwer vier Joahr laafe muß.
Nadierlisch hadd unser Karlsche e wunnerschee bundisch Schuuldudd debei, die-er mid seim linke Ärmsche umschlunge an sisch gedriggd hodd. Siehsd-de, hab isch-mer gesachd, aus meim Enkelsche wärd aach emol so-e Linksdatsch, genau so wie isch-ess bin, isch, de stolze Oba. Nadierlisch iss-ess Karlsche in Bessunge eigeschuuld worrn. Dord will der klaane Dobbscher in-de Grundschuul eifrisch leese, räschne unn schreiwe lerne. Nach deene vier Joahr Schuulzeid in Bessunge, dann geheerd mei Enkelsche fasd zu-de Eliiede von Dammstadt.

Ja, die Bessunger Labbing, die beoohspruche jo fer sisch, die Eliiede von unsere Heinerstadt zu sei. Isch als oolder Labbing hab do awwer so mei Zweifel, weil die Geschischd von-de Bessunger Eliiede meiner Eliiede-Euphorie enn gans scheene Dämpfer verbaßd hodd.
Die Geschischd erzaählt von-em Biebsche, der stolz von-de Bessunger Buuweschuul haam kimmd unn erzähld: „Baaba, heid hab isch-ess ABC von vorne nach hinne unn von hinne nach vorne uffsaache kenne. Unn aach beim Einmaleins hab isch alles ganz schnell unn rischdisch geräschent. Mei Mitschieler, die konnde dess awwer bei weidem net! Wodroo liggd dess, Babba?“
Unn sein Babba erklärd: „Ei, Biebsche, du bisd Bessunger, du geheersd zu-de Eliiede!“ Unn wider freggds Biebsche: „Babba, gesdern hawwe-mir Buuwe uns noch-em Torne naggisch geduschd. Unn do hab isch gesähje, dass all mei Mitschieler unne nur-e ganz klaa Piepmätzje hadde, unn isch hadd awwer-enn viel greeßere Piepmatz. Gäll, dess iss weil isch zu-de Eliiede geheer?“ Dodruff-de Babba: „Naa, mei Biebsche, dei Mitschieler sinn ärsd achd Joahr unn du bist awwer schon verzeeh Joahr oold!“ Guude.



 

Dieses Thema kann nicht kommentiert werden.