Jeddsd, wo-de Lange Lui widder im Lischderglanz erstraahld, do iss in unsrer Heinerstadt die Weihnachdsstimmung ausgebroche. Ja, aach-de Weihnachdsmaggd iss ereffned. Isch fer mei Daal hab die Gliehwoistimmung eischendlisch räschd gern. Graad in deene Buude, die uff-em Weihnachdsmaggd-de Chrissbaumschmugg verkaafe, kann-mer schon heid die Weihnachdsgleggelscher klingele heern.
Wann dann noch dezu-de Wind dorsch die Buudegasse blääsd, dann bimmeld’s dord uuhunnerbroche. Doch noch lang, bevor-ess Chrisskinnsche dorsch unser Heinerstadt schweebd unn die Kinnerscher bescheerd, kimmd jeddsd ersdemol de Niggeloos zu-de Schäbbe. Unn wann die dann schee bääde, e Liedsche singe odder laud-e Gedischdsche uffsooche kenne, dann schenkd-de Niggeloos deene klaane Dobbscher aach wos Scheenes.
Do wärd manschemol schun ganz schee hiiegelangd fer die Geschenke, die-de Niggeloos do aus seim Sack fer die Kinner zauwert. Ofd wärd do iwwerdriwwe, so dass-ess Chrisskinnsche sein Schaff hawwe wärd, um do noch midzehalde. Nur mid Niss unn Äbbel allaa, do kennd-de Niggeloos doch heidzudoochs in seim Winderwald dehaam bleiwe.
Ess iss noch goar ned so lang heer, do hodd-de Niggeloos noch mehr Schlee wie Bläddsjer verdaald. In meiner Kindheid iss-de Belzeniggel noch mid Krach unn Geschenn am Niggeloosdooch in die woarm Wohnstubb gestärddsd. Mir Kinner sinn nur so stifde gange. Horddisch sinn-mer unner-de Disch gekrabbeld odder hawwe uns bei-de Mudder an die Schärz geklammerd unn uns hinner ihrm Rock versteggeld.
Dodebei hawwe-mer gekrische wie am Spieß. Unn wann dann noch-de Knecht Ruprecht, der Ruußniggel, debei woar, oh weihja! Vor Schiss wär-mer als Kind am liebsde im Erdboddem versungge. An-e Geschenk hodd-mer in der Laach doch iwwerhaupd ned gedenkd. Die Hauptsach, mer kriggd ned seu Fäng mid-de Ruut unn mer wärd vor allem ned in-de Sack gesteggd unn wer-waaß-wohie mitgeschläbbd.
Nadierlisch mussde-mer sellemols noch dezu zu dem Schreck bääde unn aach singe. Beim Bääde hodd-mer dann meisdens gestodderd unn gebibberd unn beim Singe sinn aam dann nur so die Drääne die Bagge runnergelaafe. Ärsd mussd-mer greine, dann hodd-de Belzeniggel Ruuh gäwwe unn iss widder drohend abgezooche.
Äbbel unn Niss odder wos Sießes als Geschenk, dess woar gewiss kaan Ausgleisch fer so-e Tortuur. Middlerweile hawwe die Olde jo psüscholoochisch wos dezugelernd. De Niggeloos kimmd deshalb heidzudoochs ned mehr als Belzeniggel zu-de Kinner. Naa, er kimmd als liewer, guuder Weinachdsmann unn schidd sein Sack aus mid viele scheene Sache drin.
Ja, bald iss-ess widder soweid unn mir feijern-de Bescheeroowend. De dridde Advent steehd vor-de Dier. Wissd-er wos ganz wischdisch iss? Ganz kloar, bevor-mer am dritte Adventssunndoch ins Bett steijd, dass-mer die drei brennende Adventskerze ausblääsd. Sunsd gibds schun vor Weihnachde-e greeßer Iwwwerraschung. Als older Niggeloos grießd eisch heid eiern Riwwelmaddhes.

Dieses Thema kann nicht kommentiert werden.