Die grooße Ferieje steehn vor de Diier unn viele Heiner, die mache widder mid em Fliescher enaus in die weide Welt. Dodefier losse sisch viele Leid am Fluuchhafe so rischdisch drangsaliern. Heer bis mer do dorsch die Kontrolle iss unn nach eewisch langer Zeid endlisch im Fliescher hoggt, do hodd mer schon e Tortuur hinner sisch. Bei deene Eistieschskontrolle, do muß mer fasd alles ausziehje. Jagge, Hiiet, Dasche, Schlissel unn Portmonnee wärrn do dorschlaischd. Wie enn Schweerverbräscher geehd mer mid erhoowene Händ dorsch die Schleuse.

	Dateiname  :  Der Riwwelmaddhes zm Ferienbeginn Dateigröße  :  3,10 MBytes. Datum  :  24.06.2011 10:18 Download  :  Hier herunterladen

Dodebei gugge die Kontrollööre am bis uff die Unnerhoos. Unn die hawwe mei Unnerhoos wärgglisch rischdisch gesähje, weil isch aach mein Gärddel wäje de Kontroll ausziehje mußd, desdewäje iss mer mei Khaakihoos ruckzuck in die Kniekäähl gerutscht. Wischdisch iss aach, dass mer sei Fiieß frisch gewesche hodd. Oft muß mer neemlisch aach die Schuuh ausziehje. Unn weehje, mer hodd Keesfieß.

Dess stinkt dann so manschem Kontrolöör, dass er disch eifach elendisch lang wardde läßd. So manscher hodd dodorsch schon sein Fliescher verbaßd. Also Fieß vorher wesche! Wäje der Drangsaliererei unn Biiesaggerei am Fluuchhafe, verzischd isch gern uff so e Fernreis. Isch bleib dies Joahr deshalb dehaam unn erhool misch emol so rischdisch. Eischendlisch hädd unser Heinerstadt aach als Bad Dammstadt so-e rischdisch Kurstadt wärrn kenne.
Mir hawwe doch alles, uff dess ess dodefier oohkimmt. Dammstadt, die Stadt im Wald: Rundrum steehn Beem unn dodorsch hawwe mer aach die guud unn gesund Luft. Aach unsern Herrngadde wär schon so enn scheene Kurpagg. Sunndoochs spield do sowieso ofd die Mussig. Ess aanzische, wos uns fer e Kurstadt fehld, dess iss so e salzisch Quellsche. Doch dodefier hawwe mer midde in unsre Heinerstadt unsern scheene grooße Wooch. Der wieschd doch vieles uff. Solld ess wäje de fehlende Kurschadde scheidern, dass unser Heinerstadt kaan Kurort wärrn kennt, heehr, isch deeht misch freiwillisch melde. Ohne enn Fennisch Geld, deeht isch misch ehrenamtlisch fer so en gefährlische Eisatz zur Verfieschung stelle. Die kurwillische Dame kreegde als ärsdes e hisdoorisch Stadtfiehrung von mer verbaßd. Zwaamol um de Lange Lui, e Rund um die Rund Kärsch, vorbei am oolde Rathaus bis niwwer zum Schloß.
De Schweerpunkt von meiner ehrenamtlische Awweid als Kurschadde, den deeht isch uff de Oowend leeje. Bei em Rundgang dorsch des romandische Dammstadt, do kennd mer so manscher Dame ganz schee die Kur mache. Im Rosarium uff de Roseheeh, dord owwe im Rosedom, dord wäär isch umnäwweld von deene sießlische Rosediefde deene kurwillische Määdscher hilflos ausgeliwwert. Ja, so enn Kurschadde der lääbd gefährlisch. Guud, salzische Quellscher sinn bei uns net zu finne, doch unser viele Seescher unn Deischjer midde im Wald, die erlauwwe allemol enn Kurbetrieb in unsre Heinerstadt. Vielleischd kann sisch unsern neije Owwerboijemaasder dem Thema emol oohnemme. Fer misch iss unser Heinerstadt dess Kurzentrum iwwerhaupt. Guude.

Dieses Thema kann nicht kommentiert werden.