| | Echo-Online-Grafik: Gerhard Berger

Ja, mer kann-ess fasd ned glaawe, doch aach in unsere Heinerstadt nimmt die Fassnacht am Elfde-Elfde, Punkt elf Uhr elf, mid-em Beginn vun-de finfd Joahreszeid widder ihrn Oohfang. „Wos die Meenzer am Rhei, dess misse mir Dammstädter am Darmbach längst sei!“ – so odder so ähnlisch kennd dess Moddo fer die kommende näggsd Fassnachdskampanje seu.
Die wischdischsde Leid in-de Fassnachd, dess sinn die Kommideemitglieder. Die allaa fiehrn dord ess Reschiment. Manschmol kennd-mer graad glaawe, die Kommideeler hädde mid-de Fassnachd iwwerhaupd niggs am Hut. Warum? Ei, weil die ofd mid doodernsde Miiene die Fassnachd vorbereide. Do iss ganz schnell aaner-e beleidischd Läwwerworschd, wann-er bei-de Verleihjung vum närrische Orden vergässe worrn iss.

Riwwelmaddhes


Unn am Elfd-Elfde, do veroohstalde aach Kinnergärde ihrn Maddinsumzuuch. So zwische finf unn siwwe Uhr oowends maschiern die Schäbbe samd Oohhang mid ihre Lampjongs dorsch die Dunkelheid unn singe „Ladernsche, Ladernsche, Sonne, Mond unn Sternsche!“
Die Umziesch solle an-de heilische Maddin erinnern, der in-rer kalde Windernachd em oarme unn fasd naggische Bäddler die Hälfd vun seim Mandel geschenkd hawwe soll.
Unn weil der so fromm woar, do solld-er Bischof wärrn. Vor lauder Bescheidenheid hodd-er des ärsdemol abgeleehnd unn hodd sisch in-eme Gänsestall versteggeld. Doch mid ihrm Geschnadder, do hawwe die Gäns dess Versteck verroode unn er mußd sisch doch die Eehr oohduuhn losse unn Bischof wärrn. Bestimmd hodd-de Maddin die Gäns dann glei schlachde losse, wos bis heid dess Maddinsgans-Esse erhalde hodd.
De Elfde-Elfde-Zwaadausendelf iss aach-e Schnapszahl. Mid dem hochprozendische Gedränk hodd die awwer nur bedingd wos ze duuhn. Heggsdens wann Braut unn Bräudigame poar Schnäps dorsch die Goijel gejoochd hawwe. In-de Maddemaddigg do besteehd-e Schnapszahl aus mehrere identische Ziffern. Aach hodd-mer die Bedaidung vun-der Zaahl-de Kaadeklobber zugeschriwwe. Wann do enn Spieler zum Beispiel 111 Punkde erreischd, dann mußd-er seine Mitspieler enn Schnaps ausgäwwe.
Ja, Schnapszaahle wie de 8.8.1988, de 9.9.1999 unn jeddsd widder-de 11.11.2011 sinn bei-de Brautleid besunners beliebd. Die Schnapszaahl-Dooche bescheern de Stannesämder enn grooße Oohstorm vun Heuraadswillische. Noch dezu wolle die brinfdisch Verloobde aach noch an gans uuhgeweehnlische Orde heiuade. Do wärrn Ehe uff-em Wassertorm odder sogoar im Wasser geschlosse. Unn nadierlisch iss unsern Hochzeidstorm der Ort, an dem vun frieh moijends bis um Middernachd geheijerd wärd.
Doch Schnapszahle bringe ned immer Gligg. So sinn besunners viele Ehe vum 8.8.1988 längsd widder geschiede worrn. Awwer am 12.12.2012 iss sowieso Schluss mid-de Schnapszahle fer Heuraadswillische. Dodruff kennd-er enn Schnaps drinke! Guude!