Heehr, wos fern Zärrguss ääwe in unsre Heinerstadt vollfiehrd wärd. Ess wärd dodriwwer gestridde, wer von unsere Bollidigger die Uffsischd iwwer die Uffsischd von unsrer greeßde städtische Strom- unn Gas-Wassergesellschafd HSE ausiiewe soll. Do flieje der vielleischd die Fäddse. De Niggeloos, der jeddsd am sechsde Dezember kimmd, der solld all die bollidische Streidhäähn in sein Sack stegge unn solld sein Sack dann draus im Winderwald ausschidde.

	Dateiname  :  Der Riwwelmaddhes zum Nikolaus Dateigröße  :  2,87 MBytes. Datum  :  06.12.2010 17:47

Vielleischd krieje die dann dord zwische de Beem in der Eiseskäld enn kiehle Kopp unn konzendriern sisch mehr dodruff, dass die Strom- unn die Gaspreise fer uns Verbraucher net ins Uunendlische steije. Doch aach so e Sack-Therapie vom Niggeloos iss nur dann erfolschverspräschend, wenn er noch von seim Begleider, dem Ruußniggel, dem forschderreeschende Knäschd Ruppräschd, unnerstiddsd wärrn deeht. Der kennt dann mid seiner Ruut deene im Sack emol so rischdisch de Bobbes versoohle.

Doch dess versteeßd heidzudoochs gäje die Menscheräschde, deshalb iss dess net mer machbar. So solle sisch die Bollidigger, die sisch um die Uffsischd iwwer die Uffsischd bei de HSE streide, sisch doch selbsd die bluudische Kepp hoole. De Niggeloos duuht also guud droo, wenn er mid seim Sack voll Geschenke dord hiie geehd, wo die liewe klaane Kinner dehaam sinn. Unn wenn die dann schee bääde, e Liedsche singe odder laud e Gedischdsche uffsaache kenne, dann schenkt-de Niggeloos deene klaane Schäbbe aach wos Scheenes. Nur mid Niss unn Äbbel kann heidzudoochs de Niggelloss allerdings kaan Staat mehr mache.

So enn Niggeloos-Oowend wärd fer viele klaane Dobbsche schon so-e vorgezooche Weihnachde. Heehr, do wärd schon hiiegelangd fer die Geschenke, die de Niggeloos fer die klaane Kroddse do aus seim Sack zauwert. Isch saach der Eisch, dess iss fasd schon iwwerdriwwe. Wie gesachd, mid Niss unn Äbbel allooh, do kennde er doch dehaam bleiwe in seim Winderwald. Ja, jeddsd um die Zeid, im Advent, am Niggeloos, do mache viele Betriiewe, Ämder unn Abdeilunge ihr Weihnachdsfeijern. Gemeinsam wolle do die Kolleesche unn Kolleeschinne noch emol gemiedlisch unn in froher Rund sisch uff Weihnachde eistimme. So betrieblische Weihnachdsfeijern, die hawwe ess ofd in sisch unn besonnere Nachwirkunge. Besunners dann, wenn mer uff-so rer Feijer dischd an dischd unn Kärber an Kärber hoggd.

In so rer Stimmung, do iss ess bassiert, dass sogoar die hochnäsisch Schäffsegredäärin, des Fräulein Schusder, so nach unn nach uffdaud unn zugänglisch wärd. Unn weil se bei ihrm Schäff net lande kann, dess waaß-se middlerweil nach finfunnzwanzisch Joahrn Betriebszugeheerischkeid, steggd er aach so enn klaane Sachbeawweider in de Naas. Egal, Mann iss Mann, unn wenns aach nur de Buchhalder Miller iss, denkt se sisch. Doch am folschende Awweidsdoch kimmd die Ernischderung, wenn dann des Fräulein Schusder von dem verdraude Du mid dem Buchhalder Miller niggs mehr wisse will. Also dann enn scheene Niggeloosdooch, dess winschd Eisch de Riwwelmaddhes.