Eischendlisch kennd mer die Geldscheu abschaffe, weil mer fasd iwwerall bargeldlos mid de Plassdigg-Kadde bezoohle kann. In dem Zusammehang hodd em Datterich sein Spruch: "Bezaahle, wenn mer Geld hodd, dess iss kaa Kunst! Doch bezaahle, wenn mer kaa Geld hodd, dess iss e Kunst unn die muss isch ärsd noch lerne!" net mehr sei Gildischkeid.

Wär de Datterich heidzudoochs unner uns, dann braischd er die Kunst, ohne Geld bezoohle zu kenne neemlisch net mehr zu lerne. Der deeht heid midde Plassdigg-Kadde in de Händ ohne enn Fennisch Geld im Sack dorsch die Welt kumme. Viele Zeitgenosse die proddse unn haache uff de Budds, wenn die ihr Portmonnee uffschlooche unn ihr viele Plassdigg-Kärddscher demonsdradiiev zeische. Doch Vorsischd bei so Uffschneider! Do gibds viele Blender drunner, die ihre Mitmensche gäjeiwwer gern Reischtum mid viel Geld vordeische.

	Dateiname  :  Der Riwwelmaddhes über Plastikkarten Dateigröße  :  3,11 MBytes. Datum  :  03.03.2011 12:26

In Wärgglischkeid sinn so Grooßspuurische ofd so oarm wie Kärschemais unn hawwe hinne niggs druff. Heehr, geehds Eisch net aach so wie mir – mer wärd fasd meschugge – vor lauder Kadde duuhsd de die rischdisch Plassdigg-Kadd ofd net finne. Ess iss fasd zum Verrigdwärrn, mid wie viel Kadde mer sisch rumschlooche muss. Kreditkadde, Ee-Zeeh-Kadde, Tankkadde, Bonuskadde, Kundekadde, Mitgliedskadde, Krankekasse-Kadde, Eikaafskadde unn selbsd de Personalausweis unn de Fiehrerschei sinn heid Plassdigg-Kadde, die all eidräschdisch doch dorschenanner dann hinnernanner in unsre Geldbaidel stegge.

Kaddklobbe, so wie de Datterich mid em Deiwel seim zwaaunndreißisch-bläddrische Gebeedbuch in-de Wärdschafd mid seine Saufkumpaane um Geld spield, dess kann mer awwer mid deene Plassdigg-Kärddscher gewiß net. Doch wie ofd hodd schon so manscher Mensch mid so rer Plassdigg-Kadd sein ganze Kredit verspield unn sei ganz Gäärschdsche dorschgebrachd.

Gefäährlisch sinn jo besunners die Kundekadde. Mid deene Kundekadde gibd mer ofd sei Innersdes preis. Die Kaufhaiser kenne dodorsch ihre Kunde wärgglisch bis uff die Unnerhoos gugge. Mehr noch, so kann so e Warehaus sogoar erfoohrn, ob ihrn Kunde vom Dorschfall, vom Flodde Oddo, geploochd wärd. Dess iss dann de Fall, wenn du pleddslisch ganz viel Rolle Kloobabier kaafsd. Dann wisse die Firme glei, dass wos mid deiner Darmflora net stimmt. Mid Vielfliescherkadde, do wärrn die Fluuchgäst ganz besunners hoffiert.

Ja, nur midde Vielfliescherkadd wärd dei Sischerheid im Fluuchzaisch daitlisch erheeht. Nur mid der Kadd kriggsd de zukinfdisch enn Sidds unner dem en Fallschärm hängt. Aach mid de Baahnkadd kannsde bald vordeilhafder Zuuch foahrn. Weil nur die Besiddser von rer Baahnkadd dann Punkde fer Verspäädungszeide sammle kenne. Wenn de zum Beispeil iwwer hunnerd Verspäädungsminuude gesammeld hosd, dann därfsd-de mid em Reschjonalexpress ohne Zuschlooch in de ärsde Klass von Dammstadt nach Frankford foahrn.

Ab dausend Verspäädungsminuude, dann gibds e kosteloos Bladdsreservierung im ICE. Doch isch mach jeddsd Schluß, sunsd zaischd ihr mir noch die Rood Kadd.

Guude!