Heehr, isch kennt greine, wenn unser Staasthejaader am siebzeehnde Februar sei 300-jährisches Jubilääjum feijert. Dief draurisch steeh isch als vor unserm oolde Thejaader, unserm hisdoorische Mollerbau am Caroline-Pladds, dem mer den Uuhnoome "Haus der Geschichte" verbaßd hodd. Mid Bischer vom Staats- unn von Stadtarschiev hodd mer deen wunnerscheene klassizisdische Bau vollgestoppt. Deshalb iss dord in dem Grooße Haus von domols, de Vorhang fer immer gefalle. Aus die Maus!

	Dateiname  :  Der Riwwelmaddhes über 300 Jahre Darmstädter Theater Dateigröße  :  3,31 MBytes. Datum  :  18.02.2011 18:34

Die Brädder, die dord friehjer fer viele Sänger unn Schauspieler die Welt bedait hawwe, die sinn heid heggsdens noch als die Gestelle von deene verstaabde Bischerregaale in Arschieve zu finne. Net ganz so grooß, awwer fasd genau so schee, so kennde mir Heiner wie die Frankforder aach so e Aard "Olde Oober" hawwe. Dess wäär dann die waahre "Guud Stubb" von uns Heiner geworrn. Glei nach em leddsde Kriiesch iss do doch joahrelang Geld fer den Wiederuffbau von dem domolische zersteerde Landesthejaader gesammeld worrn. Wo dess viele gesammelde Geld wohl hiiekumme iss?

Dass mir dammstädter Heiner von je her ganz besunners thejaader-begeisderd sinn, dess steehd außer Frooch. Beweise dodefier, die gibds genuch. Folschendes Gesprääsch zwische zwaa Heiner duuht des mehr als verdaitlische. Do freggd der aane: "Hawwe Se aach e Abonnement in unserm Thejaader?" Dodruff seggd der anner: "Ei, nadierlisch, schon mehr als verzisch Joahr. Isch gugg schon goar net mehr hiie!"

Enn annern Beweis fer die ausgeprääschd Liebe zu unsem Thejaader kimmt von em Heiner-Ehepaar. Im Staatsthejaader, im Klaane Haus, do wärd e ganz modern Stigg gespield unn ess iss ziemlisch leer. Do seggd die Fraa zu ihrm Mann, die immer in de dritt Reih hogge: "Kumm, Willi, mir mache uns nach hinne, do kenne-mer uns leesche!"

De Landgraf Ludwisch VIII, bekannd aach als Jachdlandgraf, woar so enn fanaadische Thejaadergänger, dass er es sogoar bis zu seim leddsde Aademzuuch in seiner Loosch ausgehalde hodd. Ja, 1768 hodd den Landgraf am End von rer draagische Vorstellung de Schlooch gedroffe, unn dess genau in dem Aachebligg wie de stäärwende Schauspieler in dem Stigg den Sadds seggd: "Gott sei meiner Seele gnädisch!" unn de Vorhang gefalle iss.

Aach isch hab schon frieh Thejaaderlufd geschnubberd, unn dess ab de fuffzischer Joahrn im Behelfsthejaader Orangscherie. Isch hadd sellemols e Juuchendmied unn konnd do die grooße Dammstädter Thejaader-Epoche unner deene beriehmde Indendande unn Reschiesööre Sellner unn Hering erlääwe. Sogoar als Staddisd bin isch iwwer die knarrende Brädder von de Orangscherie-Biiehn gestolwerd. Eigehilld in e Tunika, hadd isch als grieschischer Bürscher als Daal vom prodesdierende Volk midde schwierische Worde: "Murmel,murmel, murmel!" mei Debbiie, mein ärsde Uffdridd.

So, unn jeddsd heer isch uff mid dem Affethejaader unn gradulier herzlischst unserm Grooße Haus zum 300-jährische Jubilääjum. Also dann Guude! Eiern Riwwelmaddhes.