| | Echo-Online-Grafik: Gerhard Berger

Geehds Eisch net aach so, dass Eisch-de Moat Nowember immer so uffs Gemied schleggd wie mir? Meisdens iss um die Joahreszeid schläschd Wädder: nass, näwwelisch unn drieb. Dess sinn so Dooche, wo-mer nur schweer zu sisch kimmt. Moijends iss-ess dusder, middoochs bleibd-ess dusder, unn oowends iss-ess so dusder, dass ess goar net mehr rischdisch dunkel wärrn muß.
Aach-de Volksdrauerdooch unn-de Doodesunndooch lieje noch in dem Monat unn verbreide noch zu allem Iwwel so-e Buuß-, Grääwer- unn Friedhofsstimmung. Jeddsd, am Doodesunndooch, do pilschern widder viele Leid iwwer die Friedheef im Gedenke an ihr Aageheerische, die dord in Friede ruhe.
So mansch aaner, egal ob Männlein odder Weiblein, verdriggt dann ofd doch noch-e Dräänsche, wenn-er am Grab von seine liewe Verstoorwene steeht. Wäje deene Dräänscher brauch sisch awwer kaaner zu schääme. Die Doode zu ehrn unn-se net zu vergässe, dess iss jo-de sinn vom Doodesunndooch.
Mansche äldere Leidscher halde dann aach noch Zwiesprooch mid ihrne lang Verstoorwene am Grab. Dodebei kenne-se ihr Sorsche los wärrn unn mache sisch denaach erleischderd uff-de Haamwääg. Wenn deene dann noch so-e vorwitzzisch Eischherrnsche uff-em Friedhof iwwer-de Wääg hippt, dann kumme viele Gemietslooche widder ins Gleischgewischd. Unn schon siehd die Welt widder viel freehlischer aus.

Riwwelmaddhes


Fer misch sinn Friedheef jo net mehr nur die disdere Orde, dord wo die Doode ihr eewisch Ruuh hawwe solle. Naa, unser Dammstädter Friedheef sinn fer misch aach Kunstlandschafde, sehr geschischdsdräschdische Plädds unn wischdische Kulduurdenkmäler von unsere Stadt.
Denkt nur emol an-de Aalde Friedhof owwe am Dierbrunne an-de Nieder-Ramstädter Strooß. Wer dord net alles beerdischd iss! Em Schorsch Büchner sei Schwesder unn aach-de Ernst Elias Niebergall, der schenijaal de Datterich gedischd unn geschriwwe hodd, sinn dord owwe begraawe.
De Kombonisdd Friedrisch von Flotow, der die Oper „Martha“ komboniert hodd, unn noch viel annern Aadlische, die friehje emol Rang unn Noome in unsere Stadt hadde, die lieje uff-em Aalde Friedhof.
Uff-em Friedhof muß-mer net nur mid-em ernsde Gesischd rumm laafe. Selbstverständlisch därf-mer dord aach lache. Vor allem sinn die Friedheef aach die Begeeschnungsstädde fer viele äldere Leid. Heehr, so mansch Witfraa hodd dord zwische-de Grääwer noch so-enn rissdische Witwer kennegelernt, wodruff dann die zwaa noch gemeinsam in heißer Liewesbrunfd ihrn leddsde Lääwensabschnitt genosse hawwe.
Ess gibd jo-e uuhgeschriwwe Friedhofsreeschel: Zeischd bei-em Witwer die Zott von seiner Gießkann nach hinne, dann will-er in Ruuh gelosse wärrn. Wenn awwer die Zott von seiner Gießkann, die er mid sisch rumdräägt, nach vorne zeischd, dann iss der uffs Freijersfiieße unn suchd-e lusdisch Witwe. So duuhn selbsd die Doode noch Liiewesbeziehjunge vermiddle. Guude!